TPLF cannot be reformed. Like apartheid, it should be dismantled! - ETHIOMEDIA

የአዲስ አበባ ከተማ አስተዳደር የጀመረው ኦዲት ወደ ባለ ኮከብ ሆቴሎችና ኢንዱስትሪዎች ተሸጋገረ

(ውድነህ ዘነበ) ለመጀመርያ ጊዜ በተሟላ ደረጃ መሬትና መሬት ነክ ይዞታዎችን ኦዲት በማድረግ ላይ የሚገኘው የአዲስ አበባ ከተማ አስተዳደር፣ የኦዲት አድማሱን በማስፋት በባለ ኮከብ ሆቴሎችና በኢንዱስትሪዎች ላይ ቆጠራ ሊያካሂድ ነው፡፡

የአዲስ አበባ ከተማ አስተዳደር ከ1995 ዓ.ም. ጀምሮ እስከ ኅዳር 2004 ዓ.ም. የከተማ ቦታ በሊዝ ስለመያዝ የሚደነግገው እስኪወጣበት ጊዜ ድረስ፣ ላለፉት 15 ዓመታት በኢንዱስትሪ ዞኖችና በተናጠል ለሚካሄዱ ፋብሪካዎች በርካታ ቦታዎችን ሰጥቷል፡፡ ከዚህ በተጨማሪ ለበርካታ ሆቴሎች ግንባታ የሚሆን ሰፋፊ ቦታዎችንም እንዲሁ አቅርቧል፡፡

ነገር ግን አስተዳደሩ በሰጣቸው ቦታዎች ላይ ስለተከናወነው ልማትም ሆነ፣ የተከናወኑት ግንባታዎች በውላቸው መሠረት ስለመካሄዳቸው በትክክል የተጠናቀረ መረጃ እንደሌለ ይገልጻል፡፡

በከተማው ውስጥ የሚገኙ አምራች ኢንዱስትሪዎችንና ባለ ኮከብ ሆቴሎችን ቁጥር ለማወቅ፣ በአግባቡ ሥራዎችን ባላካሄዱት ላይ ደግሞ የማስተካከያ ዕርምጃ ለመውሰድ ኦዲት እንደሚከናወን ለማወቅ ተችሏል፡፡

የአዲስ አበባ ከተማ አስተዳደር ምክትል ከንቲባ ታከለ ኡማ (ኢንጂነር) ለሪፖርተር፣ ‹‹እስካሁን ግንባታ ሳይካሄድባቸው ለዓመታት ታጥረው የቆዩ ከአራት ሚሊዮን ካሬ ሜትር በላይ ቦታ መልሰን ወስደናል፤›› ብለዋል፡፡

‹‹‹ይህ ትልቅ ሥራ ነው፤›› በማለት ምክትል ከንቲባው ገልጸው፣ በቀጣይ ደግሞ በሆቴሎች፣ በኢንዱስትሪዎች፣ በድንጋይ ማምረቻ ካባዎች፣ እንዲሁም በመኖሪያ ቤቶች ላይ ኦዲት ተካሂዶ ዕርምጃ ይወሰዳል ሲሉ ገልጸዋል፡፡

የአዲስ አበባ ከተማ አስተዳደር የጀመረው ኦዲት ወደ ባለ ኮከብ ሆቴሎችና ኢንዱስትሪዎች ተሸጋገረ

‹‹ሥራው ውስብስብ በመሆኑ የሚካሄደው ኦዲት አንዴ ብቻ ሳይሆን ሦስት፣ አራት ጊዜ ይታያል፡፡ ካስፈለገም የማረጋገጡን ሥራ ማዕከላዊ ስታትስቲክስ ኤጀንሲ ሊያከናውን ይችላል፤›› በማለት ምክትል ከንቲባው አስረድተዋል፡፡

በአዲስ አበባ ከተማ አምራች ኢንዱስትሪዎች፣ ሆቴሎች፣ ለድንጋይ ማውጪያ የተሰጡ ቦታዎች ያሉበት ወቅታዊ ሁኔታ በትክክል አይታወቅም፡፡

ለእነዚህ ዘርፎች የቀረበው ቦታ ለታለመለት ዓላማ በትክክል ስለመዋሉ፣ ከዘርፉ የሚመነጨው ኢኮኖሚም ሆነ የተፈጠረው የሥራ ዕድል ሽፋን እምብዛም አይታወቅም፡፡

ይህንን ሥራ በተሻለ ደረጃ ለመሥራት የከተማው ኢንዱስትሪ ቢሮ ከማዕከላዊ ስታትስቲክስ ኤጀንሲ ጋር በጋራ ለመሥራትም መስማማታቸው ታውቋል፡፡

የማዕከላዊ ስታትስቲክስ ኤጀንሲ የቢዝነስ ስታትስቲክስ ዳይሬክተር አቶ ዘለዓለም ኃይለ ጊዮርጊስ፣ በሆቴሎችና በኢንዱስትሪዎች ላይ ቆጠራውን ለማካሄድ ሙሉ ዝግጅት እየተደረገ መሆኑን ለሪፖርተር ገልጸው፣ በጉዳዩ ላይ ዝርዝር መረጃ ከመስጠት ተቆጥበዋል፡፡

Source: Reporter

(Visited 330 times, 1 visits today)

You might be interested in