TPLF cannot be reformed. Like apartheid, it should be dismantled! - ETHIOMEDIA

የኢትዮ-ስኳር ማኑፋክቸሪንግ ኢንዱስትሪ የወንጂ ሸዋ ስኳር ፋብሪካን ሊገዛ ነው

አዳማ ህዳር 17/2011 የኢትዮ-ስኳር ማኑፋክቸሪንግ ኢንዱስትሪ አክሲዮን ማህበር የወንጂ ሸዋ ስኳር ፋብሪካን ለመግዛት የተለያዩ ተግባራትን እያከናወነ መሆኑን አስታወቀ።

የማህበሩ አመራር አካላት የወንጂ ሸዋ ስኳር ፋብሪካን የግዥ ሂደት አስመልክቶ ከፋብሪካው ሠራተኞች፣ ከሸንኮራ አብቃይ አርሶ አደሮችና ከወንጂ ከተማ ነዋሪዎች ጋር ተወያይተዋል።

የአክሲዮን ማህበሩ የዳይሬክቶሮች ቦርድ አባልና የኮሙዩኒኬሽንና አጋርነት ልማት አማካሪ አቶ እሸቱ ገለቱ በዚህ ወቅት እንዳሉት አክሲዮን ማህበሩ የወንጂ ሸዋ ስኳር ፋብሪካን ለመግዛት በመንግስት ቅድሚያ ዕድል እንዲሰጠው እየተንቀሳቀሰ ነው።

ጠቅላይ ሚኒስትር ዶክተር አብይ አህመድ ወደስልጣን ከመጡ በኋላ የመንግስት የልማት ድርጅቶች ወደግል እንዲዞሩ በተወሰነው መሰረት አክሲዮን ማህበሩ ስኳር ፋብሪካው በግዥ ተላልፎ እንዲሰጠው የተለያዩ ተግባራትን በማከናወን ላይ መሆኑንም ጠቁመዋል።

ለማህበሩ ስትራቴጂና ፍላጎት የኢትዮጵያ ስኳር ኮርፖሬሽን ቀና ምላሽ መስጠቱን የገለጹት አቶ እሸቱ እስካሁን አክሲዮን ማህበሩ ኤች.ቪ.ኤ ከተባለ የሆላንድ ኩባንያ ጋር አብሮ ለመስራት ስምምነት ላይ መደረሱን አስታውቀዋል።

ሁለት የቻይና ኩባንያዎችም በማህበሩ የአክሲዮን ድርሻ እንዲኖራቸው ፍላጎት ያሳዩ ሲሆን ከ3 እስከ 4 ቢሊዮን ብር በላይ ገንዘብ በሃገር ውስጥ የአክሲዮን ሽያጭ ለማከናወን መታቀዱንም አቶ እሸቱ ገልጸዋል።

በእዚህም የፋብሪካውን ሠራተኞች ጨምሮ በወንጂና አከባቢዋ ብቻ 40 ሺህ ሰዎችን የአክሲዮን ድርሻ ባለቤት በማድረግ የአካባቢውን ህብረተሰብ ኢኮኖሚያዊና ማህበራዊ ችግር ለማቅለል ትኩረት መስጠቱን አስረድተዋል።

በእዚህም የወንጂ ስኳር ፋብሪካ ሠራተኞችን፣ በምስራቅ ሸዋ ዞን አምስት ወረዳ የሚገኙ አርሶ አደሮችን፣ ባንኮችንና ኢንሹራንሶችን እንዲሁም በሀገር ውስጥና በውጭ ሀገራት የሚኖሩ የአካባቢው ተወላጆችን በሙሉ የሚያሳትፍ አበረታች የአክሲዮን ሽያጭ ስልትን በመንደፍ በከፍተኛ እንቅስቃሴ ላይ እንደሚገኝ አብራርተዋል።

“በተጨማሪም አክሲዮን ማህበሩ በተለያዩ የአገሪቱ አካባቢዎች የሚኖሩ ኢትዮጵያውያንንና በማኑፋክቸሪንግ ዘርፍ ሰፊ ልምድ ያላቸውን የውጭ ኩባንያዎችን ለማሳተፍ የጀመረውን ጥረት አጠናክሮ ቀጥሏል” ብለዋል አቶ እሸቱ።

ከመድረኩ ተሳታፊዎች መካከል ከወንጂ ስኳር ፋብሪካ በጡረታ የተገለሉት አቶ ሰለሞን ጋሎሬ በሰጡት አስተያየት የወንጂ ተወላጆችንና የአካባቢውን ህዝብ በማሰባሰብና የንብረቱ ባለቤት ለማድረግ መታቀዱን እንደሚደግፉት ገልጸዋል።

“ፋብሪካው ወደ አክሲዮን ማህበር ቢሸጋገር በሙሉ አቅሙ በመንቀሳቀስ የአካባቢውን ልማት ያፋጥናል የሚል ተስፋ አለኝ” ሲሉም ገልጸዋል።

በወንጂ ዙሪያ ዋቀሚያ የሸንኮራ አገዳ አምራቾች ሕብረት ሥራ ማህበር አባል አቶ ለታ ኑራ በሰጡት አስተያየት ማህበራቸው በ314 ሄክታር መሬት ላይ የሸንኮራ አገዳ ልማት ቢያካሂድም የተሻለ ዋጋ በማጣት ተጠቃሚ መሆን አንዳልቻለ አስረድተዋል።

በተለይ ባለፉት ሁለት ዓመታት በካባቢው ተከስቶ በነበረው ሁከትና ግርግር እንዲሁም በአዋሽ ወንዝ ሙላት ምክንያት ምርታቸው በመውደሙ ለኪሳራ መዳረጋቸውን ነው የገለጹት።

ፋብሪካው በቀጣይ ወደ አክሲዮን ማህበር ከተዘዋወረ ተጠቃሚነታቸውን ሊያሳድገው እንደሚችል ተስፋቸውን ገልጸዋል።

ፋብሪካው አንጋፋ ቢሆንም በአሁኑ ወቅት ወደኋላ በመቅረቱ እምደሚቆጫቸው የገለጹት ደግሞ አቶ ነጋሽ ሸበርኬሌ የተባሉ ሌላው የወንጂ ስኳር ፋብሪካ ሠራተኛ ናቸው።

“ፋብሪካው በአክሲዮን ሽያጭ እንዲተላለፍ ማድረግ በተሻለ ለመንቀሳቀስ የሚያስችል ከመሆኑም በላይ የሠራተኛውን ተነሳሽነት በማሳደግ የተሻለ ተጠቃሚ ያደርግናል”  ሲሉም እምነታቸውን ተናግረዋል።

ለግዥ የተጠየቀው የወንጂ ስኳር ፋብሪካ 12 ሺህ 800 ሄክታር የሚሸፍን የሸንኮራ ተክል ማሳን ይጨምራል፡፡

የኢትዮ-ስኳር ማኑፋክቸሪንግ ኢንዱስትሪ አክሲዮን ማህበር የመንግስት የልማት ድርጅቶች ወደግል እንዲዛወሩ በቅርቡ መወሰኑን ተከትሎ የተቋቋመ ማህበር መሆኑ ታውቋል።

Top picture: የስኳር ኢንዱስትሪ በኢትዮጵያ

(Visited 596 times, 1 visits today)

You might be interested in